Lalə Məhərrəmli. Hesab

-

HESAB

Nələr hesablanmır, nələr.
Bu dünya hesab içində.
Allaha gedən zikrlər
Allahsız hesab içində.

Niyyətlər yiyəsiz torpaq.
Əməllər əllərdə bayraq.
Çölə hesablanan əxlaq
Çöldəki hesab içində.

Saya – saya bitirmədik.
Heç saymağı da bilmədik.
Vicdana sual vermədik.
Qoymadıq hesab içində.

Kök altılar basdı bizi.
Kəsr xətti kəsdi bizi.
Biz dəyişdik cəmimizi.
Toplanan hesab içində.

Ağıl saydı, yorulmadı.
Ömür hesabsız olmadı.
Bir ölüm hesablanmadı.
Bu qədər hesab içində

Əcəl də hesablar səni.
Bir əl bağlar gözlərini.
Qurd - quş yeyər bədənini.
Ruhunsa hesab içində.