Britaniya, Fransa və Almaniya Rusiyaya qarşı sanksiyalara razılaşırlar

Silah var? Heç nə... ancaq tualet kağızı

_{Ukrayna Təhlükəsizlik xidməti YouTube portalında gizli telefon danışıqlarının səs yazısını açıqlayıb. Bu danışıqların MH17-nin Donetsk vilayətində yerə düşməsindən dərhal sonra baş verdiyi iddia olunur. AzadlıqRadiosu səslərin həqiqiliyini müstəqil mənbədən dəqiqləşdirmək imkanı olmadığından onların məzmununa görə məsuliyyət daşımır. Oxucuların marağını nəzərə alaraq danışıqları dərc edirik.}

BİRİNCİ DANIŞIQ

Saat 16.50: Bes ləqəbli Qorlovka qruplaşmasının rəhbəri öz kuratoru Vasiliy Geranina zəng edir. Hər ikisinin Rusiya hərbi kəşfiyyat zabbiti olduqları iddia olunur.

Bes: Indicə “minaçı”nın dəstəsi təyyarə vurdu. Yenakiyevo şəhərindən o tərəfdə düşdü.

Geranin: Təyyarəçilər, təyyarəçilər hanı?

Bes: Getdilər ki, vurulan təyyarənin şəkillərini çəksinlər. Tüstülənir...

Geranin: Neçə dəqiqə əvvəl?

Bes: Haradasa... 30 dəqiqə əvvəl.

İKİNCİ DANIŞIQ

İkinci söhbətdə Mayor və Qrek ləqəbli şəxslərin danışığı verilir. Onların kimliyi açıqlanmır, sadəcə Rusiyameyli yaraqlılara aid olduqları bildirilir

- Eşidirəm, Mayor.

- Deməli belə, təyyarəni “çenruxinçilər” vurublar.

- Kim?

- Çenrnixinski postundan. Çernuxinskidə duran kazakları deyirəm. Təyyarə havada səpələnib, artıq ilk “200lük” tapılıb (hərbçilər meyidə “200 nömrəli yük” deyirlər – red.). Mülki şəxsdir.

...

- Eşidirəm.

- Dəqiq deyirəm, mülki bortdur (təyyarə - red.)

- Adam çoxdur?

- Hə, p..ts?: (ədəbsiz söz). Qalıqlar həyətlərə düşürdülər.

- Bort kimə məxsusdur?

- Hələ aydınlaşdırmamışam. Əsas hissələrin düşdüyü yerdə olmamışam. Hələ ki, ilk meyidlərin düşdüyü yerə baxıram. Burada təyyarə qalıqları, kreslolar, meyidlər var.

- Silahdan nəsə var?

- Qətiyyən heç nə. Ancaq mülki əşyalardı. Tibb ləvazımatı, dəsmal, tualet kağızı...

- Sənəd var?

- Hə. İndoneziyalı tələbənin var, Thompson universitetindən.

DÜNYA TARİXİNDƏ BUNA BƏNZƏR FACİƏLƏR

MH17 təyyarəsi silahlı toqquşmalar ərazisində qəzaya uğrayan ilk təyyarə deyil. 2001-ci ildə İsraildən - Rusiyaya uçan təyyarə hərbi təlimlər keçən Ukrayna ordusu tərəfindən vuruldu. AzadlıqRadiosu bu və buna bənzər hadisələri bir yerə toplayır. Ətraflı burada oxu

"MALAYZİYA TƏYYARƏSİNİN UKRAYNADA NƏ İŞİ?" "ŞPİON DAŞIYIRMIŞ"

_{Diqqət videonun əvvəlindəki (1:50-yə qədər olan) söhbətlərin tərcüməsini artıq vermişik. Bloqu aşağı vərəqlə, və ya burada oxu.}

Malaysia Airlines şirkəti təyyarəsinin yerə düşdüyü ərazidəki separatçılara Rusiyalı kazakların atamanı Mikhail Kozitsin rəhbərlik edir. Ukrayna təhlükəsizlik xidməti yaraqlılardan birinin onunla telefon danışığı olduğu ehtimal edilən səs yazısını dünənki videoya əlavə edib. Söhbətin MH17-nin yerə düşməsindən sonra baş verdiyi bildirilir

- Torezlə Snejnoe arasında vurulan təyyarə ilə bağlı. Sərnişin təyyarəsi imiş. Qarbovo tərəfdə yerə düşüb, ora qadın, uşaq meyidləri ilə doludur. Kazaklar getdilər baxmağa.. Televizorda göstərirlər belədə An-26-dır - Ukrayna yük təyyarəsi, amma deyirlər üstündə “Malayziya hava yolları” yazılıb... Ukraynanın ərazisində onun nə işi?

- Deməli şpion daşıyırmış. Canı çıxsın burada uçmasın, müharibə gedir...