Yanan binanın sakinlərinə pansionatlarda yer təklif olunur
"Bakıda yaşayış binasındakı yanğın nəticəsində həlak olanların ailələrinə müavinətlərin verilməsi məsələsi təcili həll olunacaq". Bunu jurnalistlərə Əmək və Əhalinin Sosial Müdafiəsi naziri Səlim Müslümov deyib.
ANSPRESS xəbərinə görə nazir deyib ki, yanan binanın sakinlərini yerləşdirmək üçün pansionatlarda kifayət qədər yer var:
"Dövlət Sərhəd Xidmətinin 10 kotteci, Əmək və Əhalinin Sosial Müdafiə Nazirliyinin Bilgəhdəki 2 kotteci, 60 otağı, Həmkarlar İttifaqları Konfederasiyasının Buzovnadakı pansionatı həmin ailələri qəbul etməyə hazırdır. Kim haranı istəsə, orada da yerləşdiriləcək. Həmin ailələr qida və geyimlə təmin olunacaq. Bununla bağlı heç bir problem yoxdur. Sakinlər tam yerləşdirilənədək həmin pansionatlarda qala biləcəklər. Cənab Prezident sakinlərin təcili yerləşdirilməsi ilə bağlı tapşırıq verdi. Bu gün hadisə ilə əlaqədar yaradılmış dövlət komissiyasının iclası oldu".
Nazir bildirib ki, hazırda hər bir zərər çəkmiş ailəyə maliyyə vəsaitinin verilməsi məsələsi həll olunur: "Həlak olanların dəfn mərasimləri dövlət hesabına təşkil olunacaq, onların ailələrinə müavinətləriin verilməsi məsələsinə təcili baxılıb həll olunacaq".
Hələlik zərərçəkən ailələrin hökumətin təklifləri ilə bağlı hər hansı reaksiyaları məlum deyil. Müxbirimiz xəbər verir ki, hazırda yanmış binanı polis nəzarətə alıb, sakinlərin harda olduğu bilinmir. Polis əməkdaşları da sakinlərin harda gecələdikləri barədə suallara cavab vermir.
HADİSƏ YERİNDƏN...
AzadlıqRadiosunun hadisə yerində olan müxbiri xəbər verir ki, hazırda binanı polislər nəzarətə alıb, sakinlərin harda olduğu bilinmir.
Əmək və əhalinin sosial müdafiəsi naziri Səlim Müslümov bildirib ki, sakinlərə dövlət pansionatlarında yer təklif olunur.
Mobilreportyor-a yazan vətəndaşlar deyirlər ki, sakinlər bu gecə pansionatlarda qalacaqlar.
Səndə bu haqda məlumar varsa, AzadlıqRadiosuna yaza, videoya, fotoya çəkib bizə göndərə bilərsən: Çəkdiklərini MobilReportyor-a belə çatdır: - Kompüterdən - Yükləmə səhifəsinə daxil olub oradakı qaydalara əməl etməklə foto və ya videolarını bizə göndər. - WhatsApp nömrəmiz (+420) 778 711 700 Görüntüləri elektron poçtla bura göndər: AzadAvropa.AzadliqRadiosu@gmail.com
Prezident yanğın yerində olub
Mayın 20-də prezident İlham Əliyev Binəqədi rayonunda yanğın baş vermiş binaya baxıb, son vəziyyətlə yaxından tanış olub.
ANS xəbər verir ki, dövlət başçısına yanğının ilkin səbəbləri, hadisə zamanı və sonra görülən tədbirlər, eləcə də xəsarət alanların son vəziyyəti, bina sakinlərinin yerləşdirilməsi və s. məsələlərlə bağlı ətraflı məlumat verilib.
Prezident İlham Əliyev vəziyyətlə tanış olduqdan sonra tədbirlərin maksimum dərəcədə operativ görülməsi üçün müvafiq tapşırıq və tövsiyələrini verib.
Azərbaycan prezidenti mayın 19-da çoxmərtəbəli binada baş vermiş yanğınla əlaqədar Dövlət Komissiyasının yaradılması haqqında sərəncam imzalayıb.
Penoplast necə yanır?
Rusiyada bir nəfər penoplastın necə yandığını təcrübə edərək Youtube-a yerləşdirib. Təcrübə zamanı penoplast bir neçə saniyə yandırılır. Penoplast tez alışır və yanmağa davam edir. Yanğın zamanı penoplastdan qara tüstü və maye formasında maddə süzülərək yanmağa davam edir