«Tanış adam görmədim»
«Məhkəmə zalında demək olar ki, tanış adam görmədim, əksəriyyət yad adamlar idi. Nəvəmdən soruşdum bunlar kimdir, dedi əmi uşaqlarım. Dedim, onda məni bu qohumlarımla tanış et».
Bunu Xədicə İsmayılın məhkəməsində iştirak etmiş anası Elmira İsmayılova ironiya ilə deyir. Bildirir ki, bu gün də məhkəmə zalı tanımadıqları adamlarla doldurulub.
Elmira İsmayılova Xədicənin əhval-ruhiyyəsinin çox yaxşı olduğunu da deyib.
Məhkəmə prosesi günortadan sonra davam edəcək.
Şahidlər dindirilir
İndilərdə Bakı Ağır Cinayətlər Məhkəməsində Xədicə İsmayılın məhkəməsi davam etdirilir.
Xarici ölkə səfirliklərinin nümayəndələri zala daxil olub. Bir neçə media orqanı təmsilçiləri istisna olmaqla jurnalistlərin əksəriyyəti bayırda qalıb.
Məhkəmədə şahidlər dindirilir.
12 avqust - Bu gün Xədicənin iki məhkəməsi var.
Ali Məhkəmədə Xədicənin şikayətinə baxılır
Avqustun 12-də Ali Məhkəmədə araşdırmaçı-jurnalist Xədicə İsmayılın şikayətinə baxılır.
Bu ilin fevralında məhkəmənin qərarı ilə jurnalist 2500 manat cərimələnib. Buna səbəb Elman Türkoğlunun Xədicə İsmayılı onun haqqında iki sənəd yaymaqda günahlandırmasıdır. Bu sənədlərin birində Elman Türkoğlunun gizli videogörüntülərlə şantaj olunaraq MTN-lə əməkdaşlığa cəlb edildiyi, digərində isə 1992-ci ildə zorlama cinayəti törətdiyi iddia olunur. Xədicə İsmayıl ikinci sənədi yaymadığını, birinci sənədi isə Elman Türkoğlunun adını və onun şəxsiyyətini müəyyənləşdirə biləcək məlumatları sildikdən sonra yaydığını bildirib.
Məhkəmənin qərarından narazı qalan jurnalist şikayət verib.
Məhkəmədən öncə Elman Türkoğlu AzadlıqRadiosuna deyib ki, Xədicə İsmayıl sənədləri ona təqdim edənin kimliyini açıqlasa, şikayətini geri götürəcək.
Xədicə İsmayıl ötən il dekabrın 5-də başqasını özünüöldürmə həddinə çatdırma ittihamı ilə həbs edilib. Fevralın 13-də isə ona qarşı mənimsəmə və vergidən yayınma kimi ittihamlar irəli sürülüb.
Xədicə İsmayıl həbsinin jurnalistlik fəaliyyəti ilə bağlı olduğunu deyir. AzadlıqRadiosunun rəhbərliyi bəyan edib ki, Xədicə İsmayılın həbsi onun ölkə məmurlarının gizli biznesi haqda araşdırmalarına görə hakimiyyətin qisasıdır.