Danışıqlar sentyabrın 5-də davam edəcək
Minskdə Ukrayna böhranı üzrə kontakt qrupunun iclası 4 saat çəkib. İclasdan sonra jurnalistlərlə «Donetsk Xalq Respublikası»nın baş nazirinin müavini Andrei Purgin danışıb.
O deyib ki, sənədlər mübadiləsi olub:
«Ukrayna tərəfi öz sənədlərini bizə verdi. Biz isə öz sənədlərimizi onlara verdik».
«İndi biz bir də sentyabrın 5-də görüşəcəyik. Yəqin ki, Minskdə».
«Məsləhətləşmələri davam etdirəcəyik. Məncə, konkretliyə keçəcəyik».
A.Purgin deyib ki, «indi taym-aut götürməyin vaxtıdır». Bu fasilədə «təklifləri təhlil etmək lazımdır».
«Ola bilsin ki, bəzi bəndlər bizim üçün məqbuldur, bəziləri Ukrayna tərəfi üçün».
A.Purgin özlərinin təklif etdiyi 9 bəndlik planı isə açıqlamayıb. O deyib ki, bunu ictimaiyyətə təqdim etməyin vaxtı deyil.
O bildirib ki, bugünkü görüşdə atəşin dayandırılması üçün ilk addımlar atıldı.
Danışıqlara yaxın olan mənbə ITAR-TASS agentliyinə deyib ki, müxtəlif işçi qruplar yaradılacaq. Bir qrup atəşin dayandırılması, digər qrup əsirlərin dəyişdirilməsi, başqa bir qrup ağır artilleriyadan və aviasiyadan istifadə və nəzarət üzrə olacaq.
Minskdə sentyabrın 1-dəki danışıqlarda konkret daha nələr olub, bu barədə məlumat verilmir.
700-ə yaxın Ukrayna hərbçisi əsir düşüb
Donetsk vilayətindəki son döyüşlərdən sonra 680 Ukrayna hərbçisi əsir düşüb. Bunu jurnalistlərə əsirlərin dəyişməsi üzrə xüsusi mərkəzin rəhbəri general-polkovnik Vladimir Ruban bildirib. Onun sözlərinə görə, Donetsk şəhərinə gətirilən bu əsirlərin 80 faizi İlovaysk ətrafında mühasirəyə düşən hərbi hissələrin əsgər və zabitləridir. Yaranmış vəziyyəti “fəlakət” adlandıran Ruban əlavə edib: “Hərbi əməliyyatlar sanki elə aparılır ki, məqsədyönlü şəkildə əsgərlərin əsir düşməsi təmin olunsun”.
AzadliqRadiosu xəbər verir ki, sosial media Ukrayna əsirlərinin alçaldılması səhnələri ilə onlarla video yayılıb. Ruban bildirib ki, Luqansk və Donetsk şəhərlərində saxlanılan əsirlərin ərzaq təminatında çətinliklər var.
NATO-ya cavab verən Putin #Ukrayna-nın paytaxtını almaqla hədələyir http://t.co/QDtK3cxZrD
— AzadliqRadiosu (@RadioAzadliq) 1.9.2014
Ukrayna desantçılarına atəş açılır
Ukrayna ordusu gözlənilməz hücumlara məruz qalıb. Rusiya sərhəddi istiqamətindən güclü hücumlarla yanaşı, artıq ordunun dərin arxasında da pusqulara rast gəlmək olur. Sentyabrın 1-də Artyomovskdan Slavyansk şəhərinə gedən Ukrayna desantaçılarının hərbi maşın karvanına yol kənarındakı yaşıllqdan atəş açılıb.
Təhlükəsizlik və müdafiə şurasının təcili iclasını toplayan prezident Petro Poroshenko parlament fraskiyalarının rəhbərləri ilə məsləhətləşmələrdən sonra ölkədə hərbi vəziyyət elan olunması qərarından vaz keçib. Bildirilir ki, Kiyev yeni şəraitdə ordunun və təhlükəsizlik qüvvələrinin yeni taktikasını işləyir.
Sentyabrın 1-də Ukrayna müdafiə naziri bəyan edib ki, Ukrayna artıq antiterror əməliyyatlarından qonşu Rusiya ilə "Böyük müharibə"yə qədəm qoyur. Onun sözlərinə görə, Rusiya onun ölkəsində qarşı qısa mənzilli nüvə silahlarından istifadə etməyi də nəzərdə tutur.
Ukrayna müdafiə nazirinin bu bəyanatı rəsmi Moskvanın kəskin etirazına səbəb olub. Rusiya xarici işlər nazirliyi bu bəyanatı məsuliyyətsiz adlandırıb. Prezident Putin isə deyib ki, istəsə Kiyevi 2 həftəyə ala bilər.