ASİM MOLLAZADƏ HAKİMİYYƏTİN MÜDAFİƏSİNƏ QALXDI
Bu video ötən ilin sentyabrında, Bakı ABŞ Mərkəzinin təmirdən sonra açılışı mərasimində çəkilib. Xarici dillər universitetinin rektoru bu videoda Asim Mollazadəni Azərbaycan müxalifəti kimi təqdim edir və deyir ki, təhsil məsələsində Azərbaycanda iqtidar və müxalifət birdir. Bu günlərdə məlum olur ki, Səməd müəllimin Asim Mollazadənin simasında təmsil etdiyi birlik ancaq təhsil məsələsi ilə məhdudlaşmır, AzadlıqRadiosuna qarşı hücumlara münasibətdə də Demokratik İslahatlar partiyası ilə Yeni Azərbaycan partiyası yekdildir.
Yanvarın 9-da "Washington Post" qəzetində dərc olunan məktubunda Azərbaycan parlamentinin üzvü, Demokratik İslahatlar Partiyasının sədri Asim Mollazadə AzadlıqRadiosu ilə bağlı Azərbaycan hakimiyyətinə səslənən tənqidlərə cavab verir.
Məktub "Azərbaycana qarşı ideoloji kampaniya" adlanır. Müəllif qeyd edir ki, Jeffrey Gedminin yanvarın 1-də həmin qəzetdə dərc olunmuş məqaləsi regionun strateji reallıqlarını nəzərə almayıb və Azərbaycana qarşı ideoloji kampaniyanı əks etdirib. Deputatın fikrincə, bu kampaniya Birləşmiş Ştatların və müttəfiqlərinin maraqlarına zərbə vurur.
"Təəssüf ki, Azad Avropa/Azadlıq Radiosu (RFE/RL) obyektiv jurnalistika prinsiplərindən əl çəkib və Prezident İlham Əliyevin düşmənlərinin şəxsi ruporuna çevrilib. Bu şəxsi hücumlar AzadlıqRadiosunun nüfuzunu sarsıdıb. Bu radioda ölkəmə gərəkən obyektiv tənqidə də yer qalmayıb. Cənab Gedmin AzadlıqRadiosunun standartlarının pisləşdiyi bir dövrdə quruma rəhbərlik edib və üzərinə düşən məsuliyyəti də qəbul etməlidir," deyə cənab Mollazadə yazır.
"Hökumətimin tənqidçisi olaraq, eyni zamanda xoşbəxtəm ki, Rusiyanın yeni yaranan Avrasiya İqtisadi İttifaqına Ermənistanı və digərlərini birləşdirdiyi bir vaxtda Azərbaycan Birləşmiş Ştatların həqiqi tərəfdaşı olaraq qalır".
Yanvarın 1-də AzadlıqRadiosunun keçmiş prezidenti "Washington Post" qəzetində AzadlıqRadiosunun Bakı bürosuna təzyiqlər haqda yazıb. Gedmin ABŞ prezidenti Barak Obamanı büronun işinin bərpası və jurnalistlərə basqıların dayandırılması üçün qəti addımlar atmağa çağırıb.
Əslində hakimiyyətin dilə gətirməyə cürət etmədiyi həqiqətləri ABŞ ictimaiyyətinə çatdırdığına görə Asim Mollazadəyə təşəkkürlər düşür. Çünki rəsmi Bakı israrla bəyan edir ki, Bakı bürosunun möhürlənməsinin jurnalistika standartları, radionun kimə ruporluq və ya antiruporluq etməsinə heç bir aidiyyatı yoxdur.
Bu postu Səməd Seyidovla başladıqsa, onunla da başa vurmaq istərdik. Səməd müəllimin rəhbərlik etdiyi Xarici dillər üniversitetində büdcə vəsaitlərinin mənimsənilməsi ilə bağlı cinaayət işi açılmışdı. Bu günlərdə hətta hökm də çıxarıldı. Lakin bütün bu illərdə Universitetin qapısını möhürləmək heç kimin ağlına da gəlməmişdi...
İkiüzlü özünüzsünüz!!!!
"Azərbaycan" qəzetinin Barack Obama haqda məqaləsini şərti olaraq belə qiymətləndirmək olardı. ABŞ prezidentinin verdiyi vədlərə əməl etmədiyini yazan qəzet iddia edir ki, cənab Obama nəinki sözlərinin üstündə durmadı, ənənəvi müttəfiqi olan ölkələri də qan çanağına çevirdi. Qəzet Misirdəki, Ukraynadakı etirazlarda ABŞ izi axtarır.
Məqalə “Barak Obamanın ikiüzlülüyü” adlanır və Nyu-York Taymsın redaktorlarının fikrini ifadə edən məqaləsindən dərhal sonraya təsadüf edir. Maraqlıdır ki, ABŞ-ın aparıcı mediasında çıxan yazının başlığında da ikiüzlü ibarəsi işlədilir, amma İlham Əliyevin siyasətinin ünvanına.
Bakıda Rusiya mediasının bürosuna hücum edən yoxdur
Azərbaycandakı xarici media mənzərəsinə nəzər salanda, Rusiyanın bir neçə rəsmi qəzet və xəbər agentliyinin, hətta İranın rəsmi xəbər agentliyinin Bakıda təmsilçiliyinin olduğunu görmək mümkündür, onlara hücum etmək, onların maliyyələrini yoxlamaq haqda heç kim düşünmür. ABŞ-ın media nümayəndəliyi isə bağlanır. Bu fikri yanvarın 12-də Vaşintonda keçirilən müzakirələrdə AzadliqRadiosu Azərbaycan xidmətinin rəhbəri Kənan Əliyev səsləndirib. Ətraflı burada oxu
XƏDİCƏNİ AZAD ETMƏYƏ ÇAĞIRIR
ABŞ Nümayəndələr Palatasının üzvü, Palatanın Avropa, Avrasiya və Yeni yaranan Təhlükələr üzrə Altkomitəsinin sədri Dana Rohrabacher Azadlıq Radiosuna qarşı baş verənlərlə bağlı bəyanat yayıb. Bəyanatda Azərbaycanın ABŞ müttəfiqi olması bildirilir, lakin söz azadlığına hücumlardan sonra Azərbaycan-ABŞ münasibətlərinin müzakirə olunmasına ehtiyac yarandığı qeyd edilir.
Höküməti Xədicəni azad etməyə çağıran ABŞ siyasətçisi, belə bir addımı Azərbaycanın xoş məramının nişanəsi ola biləcəyini yazır. AzadlıqRadiosunun Bakı bürosuna hücumu söz azadlığının pozulması kimi qiymətləndirən Dana Rohrabacher bildirir
"Mətbuat və ifadə azadlığı istənilən hökumətin vətəndaşları ilə əlaqə qurması və irəliləyişi zərbə altında qoyan korrupsiyanın əngəllənməsi üçün vacibdir. Nümayəndələr Palatasının Xarici İşlər Komitəsinin Avropa, Avrasiya və Yeni yaranan Təhlükələr üzrə Altkomitəsinin sədri kimi ümid edirəm ki, ABŞ-ın Azərbaycanla münasibətlərinə dair dinləmə keçiriləcək. Bu dinləmələr narahatlıq doğuran və əməkdaşlığın güclənməsinin vacib olduğu ərazilərin müəyyənləşməsinə yardım edəcək".